ТАТ РУС ENG LAT
Gabdulla Tukaynıñ danlıklı “Şüräle”sen bügen dönyanıñ unbiş millät balası ukıy ala. Tatar şagıyreneñ älege äsären xäzer garäp balaları da ukıy ala....

Nil YUZEEV Tukay turında… 

Nil Yuzeev (1931-1996) — ädäbiät belgeçe, tärcemäçe, G.Tukay isemendäge Däwlät premiäse laureatı, Tatarstannıñ atqazanğan fän eşleklese:

Waqtını yörter keşelär ul zaman minnän kürep,
Faydalansın şunda minnän säğäten härkem borıp, –
dip yazğan G.Tukay üzeneñ icadi qaraşların häm omtılışların açqan “Waqsınmıym” (1912) şiğırendä. Çınnan da şağirneñ älege şayartulı yulları asılda aldan kürep äytelgän süzlär buldı. Tukay icatında waqıt häm çor şunıñ qadär tulı itep çağıldırılğan ki, bez xäzer tatar şiğriäte tarixın ike çorğa bülep: Tukayğa qadärge häm Tukaydan soñğı çorlar dip, şiğriät üseşen şağirgä qarap bäyälibez. Waqıt belän genä tügel, şiğırlärneñ sıyfatın, däräcäsen häm şiğri süzneñ qimmäten dä Tukay şiğriäte belän ülçibez.
Kiläse buınnar öçen Tukay — şiğriät bizmäne, yazuçınıñ wöcdan bizmäne buldı. Aña qarap, bez şağirneñ küñel xaläten häm köräşkä äzerlegen bäyälibez, anıñ buyınça üzebezneñ icadi yalqınnı tikşeräbez. Tormışta häm ädäbiätta tarixi mogjiza, böek batırlıq yasağan qabatlanmas, xaqiki xalıq şağireneñ yazmışı şundıy bula.
Şağir talantınıñ küpqırlılığı häm yumartlığı tañ qaldıra. Añarda nindider ser häm tabışmaq yaşerengän sıman. Anıñ talantı köçe ul zamanda uq ğacäpländergän, bügen dä xäyran qaldırudan tuqtamıy.

 

(Çığanaq (tärcemädä): Tukay…: Dönya xalıqları Tukay turında / Töz. R.Aqyeget. – Qazan: Tatar. kit näşr., 2006. – 222 b.)


Kommentariy yazarga


*