ТАТ РУС ENG LAT
Gabdulla Tukaynıñ danlıklı “Şüräle”sen bügen dönyanıñ unbiş millät balası ukıy ala. Tatar şagıyreneñ älege äsären xäzer garäp balaları da ukıy ala....

Tukay tuğan köndä Şiğriät bäyräme uzdı


2016 yılnıñ 26 aprelendä Gabdulla Tukay nıñ 130 yıllıq yubilee uñayınnan Tatarstan başqalası Qazanğa Rossiä töbäklärennän, çit illärdän bik küp qunaqlar cıyıldı.

Yaz sayın Tukay  tuğan köndä Qazannıñ İrek mäydanında – M.Cälil isemendäge Tatar däwlät opera häm balet teatrı yanındağı Gabdulla Tukay  häykäle qarşında Şiğriät bäyräme ütkärelä. Bıyıl Tukay nıñ yubiley köne ayıruça cılı, qoyaşlı bulıp kilde. İrek mäydanında qunaqlarnı cır-biyulär belän Tatarstannıñ fol’klor ansambl’läre qarşı alıp tordı. Şunda uq açıq hawada kitap kürgäzmäläre häm yärminkäläre oyıştırıldı.

Şağirneñ yubilee uñayınnan Qazanda Tukay nıñ tormış häm icatına bağışlap oyıştırılğan Xalıqara fänni-ğamäli konferensiädä qatnaşuçı ğalimnär, törki däwlätlärdän çaqırılğan şağirlär häm yazuçılar, “Aq qalfaq” Bötendönya tatar xatın-qızlarınıñ IV forumı delegatları da Şiğriät bäyrämeneñ qaderle qunaqları bulıp, Gabdulla Tukay  häykälenä çäçäklär quydı.

Tatarstan Respublikası citäkçelege isemennän Şiğriät bäyräme, Gabdulla Tukay ğa 130 yıl tulğan istälekle kön belän respubliqa xalqın TR Däwlät Sovetı räise urınbasarı Rimma Ratnikova täbrikläde.

– Qazanğa bezneñ bäyräm şatlığın urtaqlaşırğa Cir şarınıñ törki illärennän – Qazaxstan, Äzerbäycan, Törkmänstan, Qırğızstannan, xätta Amerikadan qunaqlar, ğalimnär, şağirlär, yazuçılarnıñ, şulay uq çit illärdän, törle töbäklärdän “Aq qalfaq” oyışması xatın-qızlarınıñ cıyıluı nur östenä nur buldı. Kiçä Xalıqara konferensiädä tirän eçtälekle çığışlar yañğıradı. Yıraq aralarnı yaqın itep kilgän qardäşlärebezgä bez meñ räxmätle. Bügen bezne mäydannarğa Tukay  cıya, bezne Tukay  berläşterä. Tukay  üzeneñ qısqa ğomerendä zur icadi miras qaldırdı. Ğasırlar buyına öyränelsä dä äle dä tabışlarnıñ oçı-qırıyı yuq. Tukay  – ul şağir, satirik, säyäsätçe, diplomat ta. Bügenge oçraşu da açışlarğa bay bulsın. Tukay  ilhamlandıra, anıñ şäxesenä, böeklegenä böten törki millätlär soqlana, anıñ äsärläre törle tellärgä tärcemä itelä. Tukay  mirası buınnardan-buınnarğa küçep mäñge yäşäsen, xalqıbız tağın da icat ähellärenä bay bulsın, ruxi çişmäbez sayıkmasın. Böek Tukay  belemle, bäxetle, yaña ciñülärgä atlıy torğan xalqın kürep ğorurlanır ide. Böek şäxeslärebezneñ ruxlarına şifa bulırlıq ğomer kiçerik, – dip teläde Rimma Ratnikova.

Bıyıl Şiğriät bäyrämeneñ ssenarien yazuçı Zölfät Xäkim tözegän, dip xäbär itkän ide TR Yazuçılar berlege. Bäyrämdä “Aygöl” balalar ansamble, tanılğan cırçılar Vladimir Vasil’yev, Rezeda Galimova, Aydar Nurgayanov Tukay  şiğırlärenä icat itelgän cırlarnı başqardı. Tamaşaçılar bigräk tä “Tuğan tel” şiğıren yattan söylägän 3 yäşlek Arslan Sibgatullinnı alqışlarğa kümde.

Ağımdağı yılda 75 yäşlek yubileyların bilgeläp ütkän tatar şağirläre, törle yıllarda Gabdulla Tukay  premiäsenä layık bulğan Rädif Ğataş, Gäräy Räxim, Renat Xarisnıñ çığışların da bäyräm tamaşaçısı cılı alqışlar belän qarşı aldı. Rafis Qorban, Razil Väliev, Möxämmät Mirza, Robert Miñnullin, Zinnur Mansurov, Ğazinur Morat, Aydar Xälim, El’mira Şärifullina, Flera Tarxanova kebek tanılğan şağirlär Ğabulla Tukay ğa bağışlap icat itkän äsärlären uqıdı.

Älbättä, Qazan qunaqlarına da süz birelde – İrannan “Pragi” jurnalı möxärrire, tarix fännäre doktorı Sarlı Araz Mäxmät, Äzerbäycannan Bötendönya törki yäş yazuçılar berlege räise Äkbär Ğoşalı, Qabarda-Balkariä şağire Mutalib Bikbaev, Qırımnan “Yoldız” jurnalı möxärrire, şağir Diläver Osmanov, Tıwa Respublikasınnan şağirä Saylıqma Kombu tatar xalqın Gabdulla Tukay  tuğan köne belän qotlap, şağirneñ icatı böten törki xalıqlar öçen qaderle miras buluın assızıqladı.

Bıyıl Tatarstannıñ Gabdulla Tukay  isemendäge Däwlät premiäse laureatların Şiğriät bäyrämennän soñ M.Cälil isemendäge Tatar däwlät opera häm balet teatrı binasında şağirneñ 130 yıllığı uñayınnan oyıştırılğan tantanalı kiçädä büläklädelär. Tatarstan Prezidentı Röstäm Miñnexanov 2016 yılnıñ Tukay  premiälären şağir Ğazinur Moratqa, rässam Näcip Näkqaşqa häm Bolğar şähärçege muzey-tıyulığında “Bolğar sivilizatsiäse” ekspozitsiäsen tözegän icadi törkemgä tapşırdı.

Liliä Ğadelşina 


Kommentariy yazarga


*