Татарстанның Чаллы шәһәрендә оештырылган Милли җәмгыятьләр спартакиадасы кысаларында Габдулла Тукай елына багышлап, шахмат турниры узды.
Турнирда шәһәрнең төрле милли җәмгыятьләре вәкилләреннән торган барлыгы 10 команда катнашты. 36 кешенең 20се – беренче разрядтагы шахматчылар иде.
Уенда мөмкин булган 10 очконың 9ын җыеп, яһүдләр командасы җиңү яулады. Икенче урынга әзербайҗан командасы чыкты, алар җиңүчеләргә 0,5 очкога гына оттырды. Өченчедә — украин һәм мари җәмгыятьләре. Бишенче урынны 5,5 очко белән керәшен татарлары алды, алтынчыда — немецлар.
Җиңүчеләр барысы да кыйммәтле бүләкләр белән бүләкләнде. Шахматчылар киләсе елда бу турнирны халыкара итеп үткәрергә кирәк дигән фикер белән таралышты.
Чаллы шәһәре мэриясе матбугат хезмәте