Габдулла Тукай премиясе лауреатлары бүләкләнде
2026 елда Г.Тукай исемендәге Дәүләт бүләгенә лаек булган шәхесләргә премияне Татарстан Рәисе тапшырды.
2026 елда Татарстан Республикасының Габдулла Тукай исемендәге Дәүләт премиясе лауреатлары билгеле. Татарстан Рәисенең бүләкләү турындагы Указы 2026 елның 25 апрелендә дөнья күрде.
Премиягә «Дәвамы бар» шигырьләр һәм поэмалар җыентыгы өчен Сираева Лилия Фаис кызы (Лилия Гыйбадуллина); төрки музыка уен коралларын торгызу проектын гамәлгә ашырулары өчен Вертелецкий Сергей Юрьевич, Корчагин Павел Дмитриевич, Мәганов Наил Өлфәт улы, Чавлинов Эрдни Зулаевич составындагы авторлар коллективы; «Казанга Тукай кайткан» спектакле өчен Зәйниева Резеда Рифат кызы (Резеда Гобәева), Җәббаров Айдар Тәлгать улы, Талипов Эмиль Мансур улы составындагы иҗат төркеме лаек булды.
Лауреатларга премия 26 апрель – бөек татар шагыйре Габдулла Тукайның туган көнендә тапшырылды. Туган тел көне һәм Тукайның тууына 140 ел тулу уңаеннан Казанның Г.Камал исемендәге Татар дәүләт академия театрында бәйрәм концерты оештырылды. Анда Татарстан Рәисе Рөстәм Миңнеханов Г.Тукай исемендәге Дәүләт премиясенең яңа лауреатларын бүләкләде.
26.04.2026.
