Рифкать ХИСМӘТ. Мәхәббәт
/Тукайга багышланган шигырьләр/
Казан арты – Кырлай якларына
Күңелләрем барып кушылган.
Шигъриятнең олы үрләренә
Бөек Тукай килде шушыннан.
Бу үр – тауны ишмәс вакыт җиле,
Юк, юалмас аны яңгырлар.
«Туган тел»дәй халык йөрәгендә
Яшәр Тукай, мәңге яңгырар.
Балалары очсыз киләчәкнең
Аның җырын сөеп ятларлар.
Ә Кырлайга – Тукай туган җиргә –
Мәхәббәт һәм хөрмәт сакларлар.
(Чыганак: Хисмәтов Р.Ә. Күңелем көзгесе: шигырьләр/Рифкать Хисмәт. – Казан: Тат. кит. нәшр., 2007. – 158 б.).
