ХӘЙДӘР *** ("Сорасалар...")
* * * Сорасалар: — Халык туплый алыр кайдан сезнең җырлар, моң кайда? Эндәшмибез. Чәчәк тоткан килеш баш иябез туры Тукайга. «Көрәшчеләр без!» — дип исбатларга кирәкми дә...
* * *
Сорасалар:
— Халык туплый алыр
кайдан сезнең җырлар, моң кайда?
Эндәшмибез.
Чәчәк тоткан килеш
баш иябез туры Тукайга.
«Көрәшчеләр без!» — дип исбатларга
кирәкми дә хәтта мең дәлил,
миллионнарның йөзен ак итәргә
җитә кайчак, җитә бер Җәлил.
