Ѓабдулла Туҡай Байрам бөгөн

Бар күңеллелек бөтә донъяла, бар бер йәм бөгөн,
Нәмәнән был? - Мин беләм: байрам бөгөн, байрам бөгөн!

Бер мөҡәддәс хис менән һәр бер кеше хайран бөгөн;
Уйнай сазым да минең байрам көйөн: байрам бөгөн!

Арттыра, күрҙем, ҡояш ѓәҙәттәгенән балҡыуын;
«Ул кейенгәндер», - тинем: байрам бөгөн, байрам бөгөн!

Хис итеп һәр ерҙә лә бер төрлө хуш еҫ аңҡыуын:
«Еҫле май һөрткән икән донъя!» - тинем: байрам бөгөн!

Бер теләнсене ҡосаҡлашҡан күреп бер бай менән:
«Күңеле нескәргән!» - тинем: байрам бөгөн, байрам бөгөн!

Яр башынан тыңланым мин бер һыуҙың тулҡындарын,
Көйләшәләр үҙ-ара: «Байрам бөгөн, байрам бөгөн!»

Тыңланым әкрен генә иҫкәндә байрам көн елен;
Уныһы ла һөйләй таѓы: «Байрам бөгөн, байрам бөгөн!»

1908

Башкортчага М.Сираҗи тәрҗемәсе (Г.Тукайның "Бәйрәм бүген" шигыре).

(Чыганак/Источник: Тукай Г.М. Шигырьләр (татар, рус, башкорт, чуваш, удмурт,
мари телләрендә). - Казан: Татар. кит. нәшр., 2011. – 135 б).