Нинди уйга чумдың әле,
Әй, газиз кәгъбәм минем.
Менә тагын яныңа мин
Сәҗдә кылырга килдем.
Горур Тарих баш игәнне,
Кем башын имәс сиңа?!
Ил-халкының юанычы,
Күз яше димәс сиңа?!
«И туган тел, и матур тел», —
Син бит бердәнбер догам.
Шул догадан шәҗәрәмне
Аера күрмәсен Ходам.
Аера күрмәсен халкымның
Мөкатдәс моңнарыннан.
Чичән бабамнар ядкаре —
Саз, гөслә кылларыннан.
Кемгә нинди бизмән тиеш, —
Замана үзе белә.
Киләчәккә бара халкым
Синең фатихаң белән.