(Лермонтов семын)
Йолташ, йӧратымым кудалте да кораҥ,
Кеч йырым-ваш тич сылне ӱдыр-влак.
Ит поч тый нигунам шӱм-чон омсам,
Да покто шке дечет шижмаш косам.
Толеш йӧратымаш, ушетым авыра,
Чонетым кепшылтен, вик тарзыш савыра.
Толеш шижмаш, чонетым шолыштеш,
Кӱ курык семын пызыраш чот тӱҥалеш.
Кошкен пытет, но тӱзлана йӧратымаш,
Оҥ кӧргышкӧ пурен, йӱэш вӱретымат.
Керек кылдет келшалме еҥ ден илышет,
Пеш кӱчык жап гынат, но пиалан лийнет.
Ий-влак эртат, толеш йомдарыме жапат,
Чалем кая ӱпет, да лунчырга капат.
Да ты ший ӱпын шучко палыже тӱя:
Вуча тендам осал ойырлымаш тӱня!
О, кузерак раш туныкта эрталше жап!
Могай лият шоҥгемше, вийдыме, азап!
Тунам куватым тый, начар шинчан, ужат:
Туешкыше, да куптырген коваштыжат.
Шылташ тӧчет лыҥ шӱлыкым чурийыштет,
Ойгет ден тӱҥалат шорташ тый шкет.
Трук шарналтет, сынжат вет лийын ал, яндар;
Тул модын капыштет, кузе гӱжлен шӱм сар.
Кузе вӱчкалын самырык жапна мемнам,
Ала-куш мӱндыркӧ чон ӱжын лач тунам.
Ту годсо сылным шарналтет тый кенета:
Ший сеҥымаш, пиал — чыла гӱжлен эрта.
Да авалта шем шонымашын тӱтыра,
Эше чотрак чон сусырым кӱнчен кора!
Йолташ, илаш сайрак пелаш дечын посна,
Вашмутым кучашат шкетлан лиеш устан.
Толеш шке пагытыште Азраил кунам,
Кал асе тудлан веселан: «Мый шкет улам».
Молан тугеже орланаш кок еҥ олмеш,
Чыташ кок тул кинжалым вошт мучаш толмеш?
Кӧ шкет, кок чоным огеш пу, соҥлал,
Да колымашым кок пачаш пален ок нал.
1907
Маричага С.Григорьева тәрҗемәсе (Г.Тукайның "Вәгазь" шигыре).
(Чыганак/Источник: Тукай Г.М. Шигырьләр (татар, рус, башкорт, чуваш,
удмурт, мари телләрендә). — Казан: Татар. кит. нәшр., 2011. – 135 б).