2011 елда Габдулла Тукайның тууына 125 ел тулу җәһәтеннән Төркиядә оештырылган чараларга Төркиянең бик күп матбугат һәм мәгълүмат чаралары чакырулы булса да, кызганыч, 26-27 майда Г.Тукайга бюст кую, Г.Тукай исемендә парк ачылу, Татарстан делегациясенең сәфәре вакыйгалары, хәбәр агентлыкларының интернет сәхифәләре тышында, Төркиянең иң абруйлы, иң күп укылган «Хөррият», «Төркия», «Миллият», «Җөмһурият», «Радикаль», «Заман», «Акшам», «Стар», «Түрк хәбәр» кебек 28-40 битле газеталарда яктыртылмады.
Төркия дәүләт телерадио корылышы «ТРТ» нең хәбәр программаларында Татарстан парламенты рәисенең сәфәре кыска сюжетлар хәлендә күрсәтелде. Төркия президенты аппараты, Бөек Милләт Мәҗлесе, Истанбул мэриясе, Әюп районының рәсми сайтларында очрашулар хакында махсус хәбәрләр басылды, чараларның фотосүрәтләре куелды. Интернет сәхифәләрендә урын алган хәбәрләрнең эчтәлеге, гадәттә, чараларны оештыручыларның алдан язып җибәргән пресс-релиз текстыннан гыйбарәт. Анда вакыйгаларның кайбер өлешләре һәм чыгыш ясаучыларның кайбер җөмләләре генә өстәлгән. Быелгы сабан туе турында хәбәрләр, гомумән, күзгә чалынмады. Вакыйгаларга анализ ясаучы мәкалә бер генә матбугатта, «Төрк-медиа» дип аталган электрон гәҗиттә урын алган. «Мәшһүр татар шагыйре Габдулла Тукайны искә алу кичәсеннән соң туган фикерләр» дип аталган мәкаләдә автор Роза Корбан күренекле шагыйребезнең тормыш юлын тасвир итеп, иҗатының татар халкы өчен нинди әһәмияткә ия булуын аңлаткан, Әнкарада Тукайга бюст кую һәм гала-концерт турындагы фикерләре белән уртаклашкан. Концерт вакытында оештырылган китап күргәзмәсендә татарча китапларның аз, русча китапларның күп булуына игътибар иткән. Татарстан делегациясе составында килгән хезмәткәрләрнең, татар булуларына карамастан, үзара русча сөйләшүләренә борчылган. Концерт башында сәхнәгә чакырылган Фәрит Мөхәммәтшинның, халыкны иң элек татарча сәламләп, чыгышын русча дәвам иткәнлегенә гаҗәпләнүен бәян иткән: «Залда рус милләтеннән булган бер кеше — Россия Федерациясенең Төркиядәге илчесе Ивановскийдан кала, татарлар һәм төрекләр утыра. Билгеле булганча, төрек кардәшләребез русчага караганда, татарчаны яхшырак аңлый. Бер кеше өчен Татарстан парламенты җитәкчесенә русча саөйләшеп тору кирәк идеме икән?»- дип сорау куйган. Роза Корбан концерт барышында Рөстәм Вәлиевнең рус халык көе «Калинка»ны уйнавын, Татарстан җыр һәм бию ансамбленең русча җырлар, биюләр башкаруын да ошатып бетермәгән.
Без исә Әнкарага елда бер-ике тапкыр килгән татар сәнгать осталарыннан Г.Тукай сүзләренә язылган «Әллүки», «Тәфтиләү», «Зиләйлүк», «Туган авылым» җырларын ишетергә дип килдек концертка», — дип язган ул.
«Россия авазы» радиосының Төркиядәге хәбәрчесе Анатолий Корицкий Фәрит Мөхәммәтшин белән әңгәмә үткәргән. Анда Татарстан спикерынының ике ил арасындагы багланышлар турында фикерләренә киң урын бирелгән. Әңгәмә радионың төрек телендә эшләп килүче интернет сәхифәсендә басылып чыккан.