-
- Шома тормыш юлында гизгәнеңдә яңлышып тайсаң,
- Йөзеңнең дәфтәренә син хатаән кер вә тап салсаң,
-
- «Кабахәт», «бәдбәхет», «җүнсез» кеби күп ямьсез ат алсаң,
- Сине ташлап бөтен дөнья, үзең ялгыз фәкать калсаң, —
-
- Белеп тор: мин чыгармын таш күңеллеләр арасыннан,
- Көлеп тормам, карап читтән, синең бәхтең карасыннан.
-
- Бүләрмен, бергәләрмен барча кайгы, моң вә аһыңны,
- Сиңа дошманлык итмәм мин, алып күзгә «гөнаһ»ыңны.
-
- Халык ләкин сиңа иткән үзенең хөкмене бозмас,
- Егылганнарга кул бирмәс, батып барганга җеп сузмас.
-
- Җәза бирми халык һич тә гөнаһ эш, яшьрен эшләргә,
- Куша анчак кеше сизмәс рәвештә яшьрен эшләргә!
-
- Җәзалау камчысын биргән гөнаһлы ул халыкка кем?
- Түгел, юк! Бирмәгән һичкем; Ходай — гадил, Ходай — хаким!
-
- Икәү без, бер дә тилмермә халыкка, сөймәсен барсын,
- Аның күк тиз сүнә торган сөюдә ни хәер бар соң!
-
- Оныт барсын — бөтен хәсрәт вә моң-зарыңны тын эчтән,
- Хозур да эзләмә инсаф вә вөҗдан кушмаган эштән.
-
- Моны яздым, киңәш бирдем, юаттым һәм тыйдым, куштым;
- Шулай булмыйча хәл юк, инде калган мин генә дустың!
- Хатаән — ялгышып.
- Анчак — бары тик.
- Гадил — турылыклы.
- Хаким — хөкем итүче, судья.
- («…га («Шома тормыш…»)». «Шура» журналының 1911 елгы 2 нче (15 гыйнвар) санында «Г.Тукаев» имзасы белән басылган, «Пушкиннан мокътәбәс» дип куелган. Текст «Күңел җимешләре»ннән (1911) алынган.
- Г.Тукай замандашларыннан К.Мостакайның (1883-1974) истәлекләренә караганда, шигырь атаклы тәрҗемәче Солтан Рахманколыйга (1888-1916) багышланган (истәлек Г.Ибраһимов исемендәге Тел, әдәбият һәм сәнгать институты Мирасханәсендә (9 ф.) саклана).
- Әсәр А.С.Пушкинның «Когда твои младые лета…» (1829) исемле шигыре тәэсирендә язылган.
- Когда твои младые лета
- Позорит шумная молва,
- И ты по приговору света
- На честь утратила права;
- Один среди толны холодной
- Твои страданья я делю ,
- И за тебя мольбой бесплодной
- Кумир бесчувственный молю.
- Но свет… Жестоких осуждений
- Не изменяет он своих:
- Он не карает заблуждений,
- Но тайны требует для них.
- Достойны равного презренья
- Его тщеславная любовь
- И лицемерные гоненья:
- К забвенью сердце приготовъ;
- Не пей мутительной отравы;
- Оставь блестящий, душный круг;
- Оставь безумные забавы:
- Тебе один остался друг.
(Чыганак: Әсәрләр: 6 томда/Габдулла Тукай. – Академик басма. 2 т.: шигъри әсәрләр (1909–1913)/ төз., текст., иск. һәм аңл. әзерл. З.Р.Шәйхелисламов, Г.А.Хөснетдинова, Э.М.Галимҗанова, З.З.Рәмиев. – Казан: Татар. кит. нәшр., 2011. – 384 б.)).
-
|
