(Габдулла Тукай, «Милләткә» (1906). Перевод на язык саха (якутский) Натальи Харлампьевой).
Күнүстэри, түүннэри эн тускун саныыбын – норуотум,
Эн чэгиэҥҥэр – чэгиэммин, эн мөлтүүргэр – мөлтүүбүн.
Аан дойду бары баайыгар туран биэрбэппин эйигин,
Эн ытык ааккыттан аккастаныам суоҕа хаһан да!
Эн сорҕото буоларбынан киэн туттабын, норуотум,
Ырыаһытыҥ иэдээнтэн хаххалыаҕа мэлдьи эйигин.
Эн санааларыҥ, эн кутуҥ сылыталлар мин сүрэхпин,
Тэҥҥэ үөрэн, тэҥҥэ муҥатыйан баҕарабын олоруохпун.
Дойдуга тапталтан үрдүк иэйии суох бу орто дойдуга,
Мин ымсыырабын эйигинниин эрэ бииргэ буоларга!
Өлбөт суолбун мин хоһооммунан солонуом…
Оо, Айааччы, атын дьылҕаҕа мин баҕарбаппын.
Тыыммын да ыл, ырыам эрэ хааллын кэнчээри ыччакка,
Дойдум эрэ умнубатын – атынтан мин дьулайбаппын.
Өлбүтүм да кэннэ – норуотум сэмэй ааппын өйдүөҕэ,
Дьоллоох дьылҕалаах дэтиэҕим үтүмэн үйэлэргэ.
Эйиэхэ тапталбын туойбутум, төрөөбүт норуотум,
Доҕордуу истиҥник эн саныаҥ миигин. Итэҕэйэбин!
Наталья Харлампьева тылбааһа
(Чыганак/Источник: Антология современной татарской поэзии. /Составитель – Шаехов Л.С./. – Якутск: «Медиа-холдинг Якутия», 2017. – 128 с.).