(Пушкиннән)
Исәр җил! Көчлесең, син бик батырсың,
Ачулансаң, җиһанны кузгатырсың.
Бик иркенләп исәсең җир йөзендә,
Котыртып болгатасың диңгезен дә.
Көтү төсле болытларны куасың,
Теләрсәң кайсы якларга борасың.
Иреклесең: исәсең дә исәсең,
Тузан, кар туздырып юллар кисәсең.
Ирекле син, исәр җил, әйдә ис, ис!
Сиңа баш юк Ходайдан башка һич, һич!
(«Җил». — Җил. «Күңел җимешләре»ндә (1911) басылган. Текст шуннан алынган. Шигырьнең исеменнән соң «Пушкиннән» дип куелган.
Тукай бу әсәрне 1909 елда ук тәрҗемә иткән булырга тиеш (Башкуров Р. Тукай һәм рус әдәбияты. Казан : Татар. кит. нәшр., 1958. 41 б.), ләкин ул беренче тапкыр 1911 елда чыккан «Күңел җимешләре» җыентыгында гына басыла. Р.Башкуров Икетомлыкның 2 нче томына (1948) таянып эш иткән булырга кирәк, чөнки аның 410 нчы битендә әсәр «1909 елда язылган» дип күрсәтелгән.
Әсәр А.С.Пушкинның «Сказка о мертвой царевне и о семи богатырях» (1833) исемле әкиятендәге бер өзектән файдаланып язылган. Ул өзек түбәндәгечә:
Ветер, ветер! Ты могуч,
Ты гоняешь стаи туч,
Ты волнуешь сине море,
Всюду веешь на просторе,
Не боишься никого,
Кроме Бога одного.
(Чыганак: Әсәрләр: 6 томда/Габдулла Тукай. – Академик басма. 2 т.:
шигъри әсәрләр (1909–1913)/ төз., текст., иск. һәм аңл. әзерл.
З.Р.Шәйхелисламов, Г.А.Хөснетдинова, Э.М.Галимҗанова, З.З.Рәмиев. –
Казан: Татар. кит. нәшр., 2011. – 384 б.)).