Мәрхүм Габдулла Тукаевка
Ник бүген моңланып җәелә
кояшның яктысы?
Ник болай акрын тама быелгы
язның тамчысы?
Ишетелә хәсрәтле бер аһәң белән
кош тавышы да.
Уйлыйм: хәсрәт чигә шагыйрь өчен
һәркайсысы.
Дөньябызга үзгәреш, зур үзгәреш
килгән бүген.
Рух сүнеп, хис бикләнеп калган — югалган
ачкычы.
Инде безне кем генә соң елатыр,
кем көлдерер?
Ул иде — ялгыз үзе — һәр кайгының бер
ялчысы.
Безгә кем соң күрсәтер алдан өметнең
яктысын?
Инде капланды өмет — үлде, югалды
фалчысы.
Әй рәхимсез җир йөзе, ник тартып
алдың тиз генә?
Бак татарның язмышын — нинди
аяусыз язмыш икән!
Яшь кенә бер чәчкәне күпсенде бездән,
ахрысы.
Үлде дә тынды хәзер ул, нишләсен
оҗмах кошы?!
Тәгъзия милләткә булсын, ул — аның
юлбашчысы!
*Тәгъзия — үлгән кешенең якыннарын юату, сабыр итәргә өндәү.
Җамалетдин Юмаев — башкорт язучысы, тәрҗемәче.
(Чыганак: Тукай…: Дөнья халыклары Тукай турында/Төз. Р.Акъегет. — Казан: Татар. кит. нәшр., 2006. — 222 б.)