ТАТ РУС ENG LAT
Халык Тукайны олылый, бөекли, инде әллә ничә буын аңа иман китереп, күңелен түгә. Ни өчен? Хикмәт нәрсәдә? Һәр милләт, һәр халык — кавеменең исәбе-санына, җиренең зурлыгы-киңлегенә...

Шәйдуллин Шамил Мортаза улы – рәссам

Шәйдуллин Шамил Мортаза улы – татар рәссамы, «Яңа Сабан туе» картиналар циклы өчен 2000 елда Татарстанның Г.Тукай исемендәге Дәүләт бүләгенә лаек була.


Шамил Шәйдуллин


Татарстанның атказанган сәнгать эшлеклесе, республиканың халык рәссамы Шамил Шәйдуллин 1947 елның 1 августында Татарстанның Тәтеш районы Берлек авылында туа.
1968 елда – Казан сәнгать училищесын, 1974 елда – И.Е.Репин исемендәге Ленинград Нәкыш, скульптура һәм архитектура институтын, 1980 елда Россия сәнгать академиясенең Казандагы нәкыш иҗат остаханәсен тәмамлый.
Шамил Шәйдуллин Казанда яшәп иҗат итә. Ул – Татарстан һәм Россия сынлы сәнгатенең күренекле вәкилләреннән берсе, Россия Рәссамнар берлеге әгъзасы. Шамил Шәйдуллин Татарстанның сынлы сәнгать үсеше тарихына портрет һәм тематик картиналар остасы буларак лаеклы урынын алды. Казан сәнгать училищесын һәм Ленинградның И.Е.Репин институтында белем алгач, ул татар милли бәйрәме – Сабан туена (“Сабан туе”, 1974), татар нефть чыганаклары ачылуга багышланган (“Нефть ягы. Лениногорск промыселы”, 1982) әсәрләр иҗат итә. “Карт алмагач төбендә”, “Күки авылында көз”, “Минем авыл бәйрәме” кебек рәсемнәре исә сынлы сәнгать классикасына әверелде.
Соңрак ул күләмле хезмәтләргә күчә: шагыйрь Габдулла Тукайга багышланган “Халык шагыйре” триптихы, Россиянең бөек рәссамнарына багышланган “Талымлаучан атлар” триптихы, Казан ханлыгы җимерелү фаҗигасен тасвирлаган “Сөембикә ханбикә” триптихы – шулардан.
Рәссамның портрет жанрында иҗат ителгән хезмәтләре лирик хатын-кызлар образлары, замадашларының – рәссамнар, язучылар, актерлар образлары белән тулы.
Шамил Шәйдуллин автопортретларга да зур игътибар бирә, аларда ул натюрморт һәм табигать күренешләре элементларын кертеп, аеруча көч һәм тирәнлек белән үзенең эчке дөньясын ачуга ирешә. Соңгы елларда рәссам тарихи тематикада, шулай ук табигать күренешләре һәм натюрморт жанрларында эшләвен дәвам итә.
2013 елда Казанда “Шамил Шәйдуллин. Нәкыш. Графика” дип аталган альбом дөнья күрде. Аны “Заман” нәшрияты нәшер итте. Альбомдагы текстларның авторы –  Татарстанның атказанган сәнгать эшлеклесе, сәнгать белгече Розалина Шаһиева. Альбомның эчтәлеге өч – татар, рус һәм инглиз телләрендә тәкъдим ителә. Анда Шамил Шәйдуллинның ТР Дәүләт сынлы сәнгать музее, ТР Президенты карамагындагы Мәдәнияткә ярдәм итү һәм үстерү фонды, ТР Милли китапханәсе, “Казан” Милли-мәдәни үзәгендә сакланган нәкыш һәм график әсәрләре урын алган.

 

“Халык шагыйре” триптихы

 

“Тукай әкиятләре” 

 

&ldquoldquo;Янә юлга яки ятим язмышы"

 

“Дәверләр чигендә”

 


 

Комментарий язарга


*