Бер кешенең ике угылы бар иде. Берсе җүнле генә җегет иде. Икенчесе «Бәянел хак» мөгайян мөхәррирләреннән* иде.
Бер кешенең ике угылы бар иде. Берсе «Хак»** былчырагы белән кешегә тәкфир ыргытмый иде. Икенчесе Мостафа Лотфи иде.
Бер кешенең ике угылы бар иде. Берсе җырлау һәм тәганнидә маһир булып, моганнилекнең фәрде камиле иде. Икенчесе исә билгакес: Камил Мотыйгый иде.
Бер кешенең ике угылы бар иде. Берсе үз урынын белә, … иде. Икенчесе хәзер юбилей ясамакта булган мөфти3 иде.
Бер кешенең ике угылы булып, икесе дә мулла иде. Берсе Габдерразакъ атлы иде. Икенчесе Габдессабур атлы иде. Болар икесе дә корбан итләрен яраталар иде.
Бер кешенең ике угылы бар иде. Берсе мәгърифәтле, галим иде. Ә берсе просто татар мөгаллиме иде.
Бер кешенең ике котырган эте бар иде. Берсе үз ботын үзе тешли иде. Икенчесе бөтенләй Ишми иде.
Бер кешенең ике угылы бар иде. Берсе ишетмәгән-күрмәгән эшләрен ялганлап язмый иде. Икенчесе Рәшит казый иде.
Бер кешенең ике угылы бар иде. Берсе кешелектән чыккан хулиган иде. Икенчесе дә милләтен вә динен саткан уфалы бер имам иде.
*
Бер кешенең ике угылы бар иде. Берсе ярты татар, ярты сарт иде. Икенчесе татар имлясын төзәтеп бетергән Нугайбәк Гыймад иде.
*«Бәянел хак» мөгайян мөхәррирләреннән — Мөхәммәтҗан Сәйдәшев.
**«Хак» — 1911 елда Әстерханда чыккан (20 сан) төрекчә ислами газета.Нашир һәм редакторы — Мостафа Лотфи Исмәгыйлев-Ширванский.
***мөфти — 1911 елда Диния Нәзарәте мөфтие Мөхәммәдъяр Солтановның бу вазифаны үти башлавына 25 ел тула, һәм бу нәрсә татар-мөселман җәмәгатьчелеге тарафыннан билгеләп үтелә.
Мөгайян — билгеле.
Тәкфир ыргыту — «син кяфир» дип йөзгә бәрү.
Тәганнидә маһир — моң, музыкага оста.
Моганнилекнең фәрде камиле — җырчылыкның бердәнбер осталыгы.
Билгакес — киресенчә.
("Хикәя язарга теләүче яңа әдипләргә үрнәк". (Чыганак: Тукай Г. Сайланма әсәрләр: 2 томда/Габдулла Тукай. – Казан: Татар. кит. нәшр., 2006 (1 т.: Шигырьләр, поэмалар/Төз.: Н.Хисамов, З.Мөхәммәтшин. – Казан: Татар. кит. нәшр., 2006. – 271 б.)). «Ялт-йолт» журналының 1911 елгы 23 нче (4 июнь) санында «Мөхәррир мин түгел» имзасы белән басылган. Беренче мәртәбә икенче дүрттомлыкка кертелгән. Текст журналдан алынган).