-
- Бакчы аучыга,
- Кош аулаучыга:
- Шактый читен эш —
- Арый, талчыга.
-
- Йөгрә дә чаба
- Кич-иртә бердәй;
- Маңлайдан ага
- Тирләр яңгырдай.
-
- Очадыр үрдәк,—
- Тизрәк бул, тизрәк:
- Китмәсен ерак,
- Ат мылтыкны, ат!
-
- Атты, шарт итте,
- Каты җил чыкты,
- Эшләпә җилгә
- Очты да китте.
-
- Үрдәк югалды,
- Эшләпә калды;
- Мескен эшләпә
- Җәрәхәтләнде.
-
- Аттым мин кошка,
- Китмәде бушка:
- Алып кайтамын
- Мәҗрух эшләпә.
-
- Көлсә көләрләр
- Кешеләр, күреп;
- Тишекләреннән
- Җил торыр өреп.
- Мәҗрух – яралы.
- («Күңелле сәхифәләр». — «Күңелле сәхифәләр» («Мәктәп мөкяфәте», 4 нче китап) исемле җыентыкта басылган.
- Текст шуннан алынган.
- 16 битлек бу китап төсле рәсемнәр белән бизәлеп, балалар зәвыгына туры килерлек итеп эшләнгән.
- (Күңелле сәхифәләр. Казан: «Сабах» көтепханәсе, «Милләт» матбагасы, 1910. «Теркәү дәфтәре»ндә «Күңелле сәхифәләр»нең дөньяга чыгу вакыты «1910 ел, 12 апрель» дип күрсәтелгән. Искәрмәләрдә «Күңелле сәхифәләр» (1910) дип күрсәтелә.
- (Чыганак: Әсәрләр: 6 томда/Габдулла Тукай. – Академик басма. 2 т.: шигъри әсәрләр (1909–1913)/ төз., текст., иск. һәм аңл. әзерл. З.Р.Шәйхелисламов, Г.А.Хөснетдинова, Э.М.Галимҗанова, З.З.Рәмиев. – Казан: Татар. кит. нәшр., 2011. – 384 б.)).
|
