Безнең чишмә — салкын чишмә,
иртә белән туңадыр;
Әй… төнлә йөргән яшь егетләр
кызлар белән кунадыр.
Ач тирәзәң җиләзгә,
ки камзулың көязгә;
Әй… исмең кушып җырлар идем —
фаш буладыр өязгә.
Киртә буе сигез юл,
сигезе дә тигез юл;
Әй… кызыңны безгә бирмәсәң,
бизгәк тотсын сигез ел.
Без барабыз Кырымнан,
Кырым шәһәр кырыннан;
Әй… бәнем җаныем булса,
таныр җырлап килгән җырымнан.
Әдрәс бишмәт җиңе озын,
җиңе озынга төн озын;
Әй… төн озынын шуннан беләм:
бер түшәктә бер үзем.
Челтәрле күпер өстендә
көзгеле поднос бән юдым;
Әй… үзең былбыл, сачең чылбыр,
кемнәр өчен сән тудың?
Челтәрле күпер тактасын
җиз дагалы ат таптасын;
Әй… сезне безгә, безне сезгә
кайчан дошман мактасын.
Урманда агач шартлыйдыр,
куян вак-вак атлыйдыр;
Әй… дошман безне ашар иде —
бер ходаем саклыйдыр.
Шыбыр-шыбыр яңгыр ява
аккош балаларына;
Әй… нужа күрми гакыл керми
ата балаларына.
Ишек алдың бозлавык —
таеп егылган тавык;
Әй… кызыңны безгә бирмәсәң,
битеңә чыксын сызлавык.
Бәнем кан җирән атым бар,
һич суктырмай малкаем;
Әй… кулъяулыгын болгай-болгай
елап калды җанкаем.
Без барабыз Аскәнттән,
Аскәнт тавы астыннан;
Әй… бәнем җаным елап калды
француз яулык астыннан.
Җырлар дәфтәре >>>