Цензурын кӱчшӧ йомын куш,
Нужналык, тарзылык, кул уш?
Торашке таче шакше пуш
Мемнан дечын корангын!
Татар, кеч руш, ончал йырваш:
Права чылаштын иктӧр, раш.
Могае эрык там улмаш
Палат ынде пеш ямлын.
Цензур пӧлка ок поч капкам.
Куш ужалаш йошкар чиям,
Лыҥ чернила-влак заводлам
Панкрутыш савыралын.
Шагал мо самырык еҥ-влак
Пытеныт сарыште титак.
Эрласе эрыкын ӱмбак
Мыняр йоген вӱр талын.
Студент-влак колышт — элын чап —
Тендан верч пытыш нӧргӧ кап.
Лӱмдам тегак ок ӱштыл жап,
Кӧ талын кучедалын.
Эртеныт, илышым пуэн,
Шортде, вурс мурыштым мурен,
Ыш лӱдыктӧ осал кастен,
Тюрьма-влак, озыркаҥын.
Огеш кӱл шып лияш тетла,
Шомак рудалтын кеч-кӧлан,
Шке шӱшпыкыштым калык-влак
Тек колыштыт шӱманын
*
Перо, уш-акыл эрыкан,
Вуйнажым савена тудлан,
Кӧ тамыкым поктен чолган,
Кӧ тыныс верч шогалын.
Айла тек тыныс ты чонлам!
Вет нуно пуышт илышлам,
Чӱктен йыр эрык ӱжарам,
Шогалыныт чот талын.
1905
Маричага С.Григорьева тәрҗемәсе (Г.Тукайның "Хөррият хакында" шигыре).
(Чыганак/Источник: Тукай Г.М. Шигырьләр (татар, рус, башкорт, чуваш, удмурт,
мари телләрендә). — Казан: Татар. кит. нәшр., 2011. – 135 б).