(Лермонтовъя)
Эше, яратонэн эн пуны юн гозы,
Чеберайёс уно — эн учкы шоразы!
Сюлэм ӧстэ юнгес тон пытса тунгонэн.
Яратонэз эн лэзь — тон улля ӵужонэн.
Вуиз ке яратон — тонэ со котыртоз,
Дуроз но сьӧлталоз, ляльчи дыре вуттоз.
Вуоз но жалятэк со лушкалоз лулдэ,
Гурезь кадь пачкатоз — ыштод шокан калдэ.
Куасьмод, нош яратон улоз, ялан пушъёз,
Гадяд мертчиськыса, сюлэм вирдэ сюпсёз.
Герӟад ке но астэ яратоно муртэн,
Вакчи дырлы гинэ улод тон шудбуоен.
Дыр ортчемъя выёд курадӟонъёс пӧлы,
Пельдӥньёстэ соку азвесялоз арлыд.
Пурысьтанлэн пусэз лулэз шугомытэ:
Весяк люкиськонлэн возьма тем пеймытэз!
Ортчем дырлэн вӧсез пуксёз мылкыд вылад,
Басьтоз лул шуныттэ — кылёд тон буш галак!
Та вакытад шуак адӟод тон кӧшкемыт:
Губырскемын кышно, ьшныр кисырскемын…
Мӧзмон но ӝож мылкыд синдэ вотсалоз.
Гуньдод куректонлэсь, синкылиед васькоз.
Тодад ваёд, кыӵе чылкыт вал со ымныр,
Егит дырлэн пӧсез шудйз-ӝуаз бам тыр.
Улон вал туж чебер, югыт но бугырес,
Лулыд лопыръяськиз, куриськыса кыре.
Пуктод на син азяд яркыт буёлъёсты:
Шулдыр ӵашетонъёс, вормон, шудбур но тыл.
Соку секыт малпан пеймыт бусэ выйтоз,
Лул висёнэд соку юнгес курадӟытоз!
Яратонтэк, эше, — со шонергес улон,
Чошен ӧвӧл — оген — капчи со — кыл кутон.
Вуиз ке Азраил тонэ нуон понна,
Шулдыр серектыса шуод: «Мон одӥгнам».
Малы бен кык полэс тыныд курадӟоно?
Малы бен курбонэз кык пол ик сётоно?
Огназ ке адями — кык лулъёсты ут сёт,
Кулон азе кык пол со ноку но уг пот.
1907
Удмуртчага С.Матвеев тәрҗемәсе (Г.Тукайның "Вәгазь" шигыре).
(Чыганак/Источник: Тукай Г.М. Шигырьләр (татар, рус, башкорт, чуваш,
удмурт, мари телләрендә). — Казан: Татар. кит. нәшр., 2011. – 135 б).